猪仔 的个人资料Pigじゃんの家照片日志列表更多  |  工具 帮助 |
|
3月30日 七年之痒 虽然话庆祝，不过我地都系晏昼先见面，首先我地去咗睇The Golden Compass,发觉出戏真系唔错！不过猪仔都俾佢吓咗几擭，因为好多野都发生得好突然啊！唉，没计，猪仔就系惯咗睇咩都好投入，所以同我睇戏都要做好心理准备啦！因为我随时需要纸巾同强壮的手！
 讲真，睇甘耐，我始终都搞唔明究竟Nicole Kidman扮演的角色系好定坏咯？？？尼个问题睇黎都要睇埋剩翻的两部续集先搞得明咯!!!! 睇完电影就当然系要去食饭啦!原本唸住试法国菜，不过因为老公仲没好晒，所以决定改为日本料理。不过尼个决定搞到我地又使咗次冤枉的打的钱，原因系老公提议去友谊果边食，我就口快快话世贸楼上有间可以去试，跟住两条友就即刻飞的奔过去了，点知去到，发觉间野系食铁板烧为主，没计，唯有改道去宜安过边稳下，行到天桥，老公突然话不如去中森名菜啊，于是两条友就又扬手飞的去天河果边了！唉～点解唔一早唸好去果度尼！甘就白白晒咗十几蚊。。。。
 去到中森名菜，顶！好多人要等位！感觉好失望，一D情调都无，吵喧巴闭。不过都系要等，好彩老公犀利，问服务员有没2人房间，如果唔系我地就要坐大厅了！今次猪仔终于大开眼界啦，成日话日本料理好贵，我今日终于见识到啦！成千蚊的酒，成千蚊的刺身仲有好多好多贵价野！哇！真系劲啊！经过一轮思前向后，终于决定食咩了，一个杂锦寿司，一个铁板烧，原本惊唔够食，仲想继续点，但落单果个就话够食了，所以阻止咗我地，不过事实证明佢系对的，因为食寿司果时，我地都觉得食到好饱！到咗埋单果时，俾张单吓咗跳，总共575蚊啊！剩系茶位就28蚊一位了！！天啊！从黎没试过两个人食甘贵的饭啊！不过睇在今日甘特别，都无办法啦～～～～而且个建议又系我提出的，唯有接受啦！ 翻屋企过时，无聊同老公讨论点解我地可以一齐甘耐尼个问题，但结果我地两条友都系答唔出，唸唔明咯！其实猪仔觉得我地成日都互相包容对方尼点可能就系其中一个原因啦，而且习惯咗一齐甘耐了，猪仔都唔敢想像如果分手会点。讲真，老公的确好多缺点，但猪仔又何尝唔系尼，总之既然系埋一齐，就应该好好珍惜对方，学识包容对方的缺点真系好重要咯！记得清远培训的时候，老师就一直教我地，唔好成日唸住改变人地，因为根本無可能做到，你只能做的系改变自己。所以既然改变唔到了，甘就唯有自己做好D，弥补翻佢的不足啦！
3月19日 河源之旅 适逢三八妇女节，支行组织全行上下齐齐去旅行，今次一共分咗几批去，而猪仔就安排系最后一批。虽然话最后一批，但都系最多人的一批咯！原黎河源离广州都几远噶，猪仔坐车坐到pet pet痛都没到，觉都训醒了，部车都仲系系条高速公路到狂奔紧。一到河源都已经话食中午饭了，一场大战后，我地就坐车去到第一个目的地野趣沟啦，话明野趣沟，就当然有条细到没得再细的水沟啦，好在D水都好清。不过竟然有人系条沟度洗脚！天啊，等我仲特登掂下D水，感觉下冰凉的感觉！一路行山路上山，吸收咗好多负离子啊，希望可以减D肥肉啦！发觉同行的人都几闷，所有人除咗我地昌岗3条女人好有mood到处玩，到处影相，其他人，行到一半就唔见人咯，估计都系落翻山到车上无聊啦！结束的时候发生咗件几激气的事情咯，我地见未开车就落车影下大门口棵桃花树咯，导游都睇到我地落车，但点知拍完，竟然发觉佢地开车走人！跟住我地3个就即刻一路狂奔追车啦，好彩车上D人提醒，佢地先及时停车，等我地上翻车。真TMD郁闷！
行完山，我地就去咗浸温泉啦，不过因为刚好三八正日啦，所以超级多人去果度浸，搞到个个池都鬼死甘多人，毛巾又鬼死甘缺。不过都有开心的地方，就系浸鱼疗池的时候，被D鱼仔咬好搞野啊！超级痕啊！！！！！
最衰多人啦，搞到一有人郁，D鱼就走晒，又要慢慢等佢地翻黎咬过。不过因为时间好赶，所以都没好好享受到其他温泉！有好多池都没去浸！！！ 浸完温泉我地就去吃饭，途中地陪讲被我地听食街系边，跟住我地就决定睇完过喷泉就去试宵夜！讲真个喷泉虽然话系世界第三高，不过实在没乜特色啊，我地睇咗阵就去稳野吃了。首先我地先食麻辣烫，河源的麻辣烫有D唔同啊，虽然都系自己拣食咩，但佢地就会提供个鸳鸯汤底俾你自己渌黎食啦。都算几过瘾啦！而且价钱都OK，汤底5蚊，其他就5毫到2蚊。食饱后我地就边逛街边翻酒店啦。临翻到酒店，我地又发觉个食宵夜的好地方，于是我地又坐低试咗个炒山坑螺同埋著名的猪脚粉，感觉炒螺比粉好食！翻到酒店，冲完凉我地就上床训觉了。不过正所谓3个女人一个虚嘛！我地系甘系度倾计，倾到都唔知几点先训咯！！
第二日，我地去咗镜花緣，又再次行山，不过今次我地可以见到好出名的万绿湖啦，D水真系好绿好干净啊！不过因为好耐无落雨，搞到个水位好低啊！总的黎讲，镜花缘就没咩好行了，不过行红颜洞就几刺激啦，因为都几暗，而且得我地3个人行，好有探险feel啊～～
中午吃完饭，我地就齐齐去买手信。因为阿妈话唔需要买药材，所以我就剩系买咗只五指毛桃鸡做手信。至于俾老公的手信就多咯，五指毛桃啦，七指毛桃啦，飞天擒蛯啦，五指毛桃鸡同埋栗子。
虽然今次个旅行好赶，好多人，但都好开心啊！希望好快又可以去旅行啦！
|
|
|
